Aktuelles

Laudatio von FUKO-Präsident Beat Loosli

Liebe Sigi:

Du bisch en Fasnächtler, wo d'Fasnacht i ihre besinnliche, poetische aber ou mängisch nachdänkliche Art liebt. D'Basler würdi säge: Du liebsch d'Frou Fasnacht.

1964 hesch du zu de Geburtshälfer vo dr Baunause-Zunft ghört und hasch grad no dr Name für die neui Zunft gleferet. Scho bald bisch du für die träfe Schnitzelbänk vo dr Banause so quasi als "Hofschriiber" verantwortlich gsi. Mit Witz und Pointe hesch du träfi Bänk chöne schriibe. Aber ou be de Schnitzelbänk hesch du dini fini Art pflegt. Wörter aus der Fäkalschublade sind för de absolut Tabu gsi und das gelt för de ou höt no.

Als Schriiber hend de aber ou anderi Sache a dr Fasnacht greizt. Mängem Obernaar - ond so chom eg weder a Afang vo minere Laudatio - mängem Obernaar hesch du bi sinere Proklamation gholfe und das net nor de Banauser-Obernaare. Aber ou do hesch du de als Fasnachts-Gschechtsschriiber gseh und hesch net dr einfachi Lacher gsuecht. Ganz i dr Tradition von Basler Fasnachtszettel.

Nachdäm in Oute alli drei Fasnachtszytige gstorbe gsi sind, hesch du de im Kofaz (Kommitee Oltner Fasnachtszeitung) ab 1995 mit andere Fasnächtler zäme do und Biiszange während mängem Johr mitgstaltet.

För d'Banausiade hesch bim Schriibe en wiitere Passion för de entdeckt: dr Sketch. Am Rollespiel - am liebschte för zwei Personen - hesch du dini genaui Beobachtigsgab in Wort chöne fasse und hesch schonungslos die Charaktere usgschält und überspitzt - zum Gaudi und Fröid vom Publikum.

Bis jetzt het alles mit Schriibe z'tue gha. S'Pfiffe wöt eg aber net vergässe. Du liebschs Piccolo ond hesch sälber gärn pfiffe. Net ome bi de Banause bisch du Namensgäber gsi; ou binere Pfyffergruppe - bi de Spotzünder - het en Spruch vo der zum Name g'führt.

Liebe Sigi:

D'Oltner Fasnacht dankt der für die grossi Schaffenschraft, für dini Hilarität und für dini Bericherig vo der Oltner Fasnacht mit em "Goldene Oskar 2016".